Nagtipon ang kapin 400 ka mga unconsolidated traditional jeepney drivers kag operators para mag rally sa atubang sang Bacolod City Government Center sa pag-athag nga indi masarangan sang modernized jeepneys nga maakomodar ang tanan nga pasahero sa ciudad.
Sa interview sang Bombo Radyo Bacolod kay Rudy Catedral, presidente sang Bacolod Alliance of Commuters, Operators and Drivers (BACOD) – Manibela, alas- 4:30 sang kaagahon nagtipon na ang mga miyembro sang BACOD, Kabacod Negros Transport Organization (KNETCO), kag Pinagkaisang Samahan ng mga Tsuper at Operator Nationwide (PISTON).
Suno diri, nagapasalamat ini nga may pagbag-o na sa liderato sa ciudad bangod ginapamatian na sa karun ang ila nga ginasinggitan.
Ila ginapanawagan nga ipatawag ang Land Transportation Franchising and Regulatory Board (LTFRB) kag ilakip sila sa meeting kun sa diin ang Local Government Unit ang magapatunga diri.
Suno pa diri, dapat ang LGU ang madeterminar kun pila ka units ang kinahanglan kag indi ang LTFRB nga wala nagapaminsar kun sin-o ang mawad-an sang palangabuhian.
Nagapasalamat ini nga sila gin-atubang ni Bacolod City Mayor Greg Gasataya kag Councilor Atty Dindo Ramos, chairperson sa committee on Transportation.
