Nangin madinalag-on ang ginpatigayon nga gift giving sang Senate Spouses Foundation Inc nga ginpatigayon sa isa ka mall sa reclamation area sa Bacolod City.
Gintambungan ang aktibidad ni Ciara Sotto nga bata ni Senator Tito Sotto.
Suno kay Ciara, siya ang nagtilawas sa iya iloy nga si Helen Gamboa para sa pagpatigayon sang nasambit nga aktibidad.
Suno diri, ang tinutuyo sang nasambit nga aktibidad ang agud nga mapabatyag sa pila ka mga kabataan kun paano ang magpamakal sa isa ka mall.
Dugang pa sini antes pa man sila nagpadulong sa ciudad sang Bacolod agud nga magpanagtag sang gifts para sa mga pili nga mga kabataan sila ang nagikan sa General Santos City sa Mindanao para man sa kaangay nga aktibidad.
Nagalaom man ini nga nalipay man ang mga kabataan sa ila ginpatigayon nga gift giving.
Ang average nga ginahatagan sang mga ini sang gifts ang yara sa 45 tubtob 60 ka mga kabataan.
Nagdangat sa 45 tanan ka mga kabataan nagikan sa Bacolod City ang nakabaton sang gift certificates nga nagabalor sang P6,000 nga halin sa nasambit nga foundation kag sang ila partner nga SM.
Samtang, para naman sa alkalde sang Bacolod City nga nagaselebrar sang iya kaadlawan kahapon, Nobyembre 19 ang wish sini ang mas madasig nga pagrestore sang kuryente kag pagbalik sang internet connection sa tanan nga balay.
Dugang pa ni Mayor Greg Gasataya nga wish man sini nga mangin 24/7 ang supply sang tubig kag good health sa tanan.
Wala man ini sang selebrasyon kag una naman nga nakatawag ang Senate Spouses Foundation Inc (SSFI) sa ila nga mapatigayon ang mga ini sang gift giving sa nasambit nga adlaw gani ginfacilitate nila ini.
Ginpasalamatan sang alkalde ang SSFI sa pagpili sa Bacolod City nga diri sila magapatigayon sang gift giving.
