Arestado ang isa ka dismissed nga pulis matapos nangawat sang motorsiklo sa DECA Homes Subdivision, Barangay Cabug, Bacolod City sang Nobyembre 19, ala 1:10 sang kaagahon.
Sa interview sang Bombo Radyo kay Police Captain Andy Ofalia, station commander sang Bacolod Police Station 9, ginkilala ang suspetsado kay Wenefredo Casuyon Jr., 46-anyos, isa ka dismissed PNP personnel kag residente sang Block 83, Lot 4, Glendale Homes Subdivision, Brgy. Granada, Bacolod City.
Suno kay Ofalia, alas 12:40 sang kaagahon sang nakabaton sila sang report nga may yara sang carnapping incident sa nasambit nga lugar.
Suno diri, nakibot na lamang ang tag-iya nga si Jofranz Mier Anduyan, 19-anyos, nga hinali lamang nga nag-andar ang Suzuki Raider FU sini nga nagaduag sang pula ka puti.
Gilayon ini nga nagtawag sa gwardiya sang subdivision kag didto natigayon nga mapunggan si Casuyon sa pagwa sa lugar.
Natukiban nga gin-utod sini ang wiring sang ignition rason kun ngaa natigayon nga napaandar ang motorsiklo apisar nga wala ini sang ginauyatan nga yabi.
Suno kay Ofalia, si Casuyon ang nakasulod sa Philippine National Police sang 2010 kag PO1 ang ulihi sini nga ranggo antes siya nadismiss bangud sa kaso nga physical injury kag pagpangawat man sang mga parte sang motorsiklo.
Sa karun nakahunong ini sa Bacolod Police Station 9 kag magapangatubang sang kaso nga carnapping.
