Pagkay-o sang taytay ang nagapanguna nga gina-ayo sang mga pumuluyo sa Sitio Tabidiao, Brgy Mailum, Bago City.
Sa interview sang Bombo Radyo Bacolod kay Barangay Tanod Thomas Villanueva, tuman ka budlay sa ila ang sitwasyon agud makasulod kag makagwa lamang sa Sitio Tabidiao 1 kag 2.
Ini matapos ginguba kag gin-anod sang baha tuga sang Bagyo TINO ang ila nga taytay.
Bangod sini, sila ang naghimo na lamang sang kawayan nga hagdanan panaog sa pil-as sang suba kag pasaka sa tabok.
Ang pil-as ang may kata-ason nga masobra 50 feet.
Agud mapatabok ang mga gamit, ini ang ginapakabit lamang sa kalat kag ginabutong sa pihak.
Apang suno kay Villanueva, tuman ka budlay para sa mga pumuluyo partikular na sa mga tigulang, kabataan kag mga may balatian ang magsaka panaog sa hagdan.
Dugang pa nga ini ang peligroso kag nagakaguba sa idalom kun mabaskog ang daludo sang tubig sa Binalbagan river.
Bangod madamo sang naguba ang balay, sila ang nagtinir sa evacuation center, nga mabudlay para sa pagtabok kada adlaw bangod sila ang may ginatala-uma nga mga kasapatan kag pananom.
Indi man sila makatabok kun mataas ang tubig sang suba.
Gani nagapangabay si Villanueva nga una nga masolusyonan ang paghimo sang taytay bisan hanging bridge lamang.
Bangod paagi sini, sila ang makatabok gihapon bisan madalom ang tubig sa idalom, samtang mapatabok naman nila bisan ang mga motorsiklo.
Suno kay Villanueva, taytay gid ang nagapanguna nila nga kinahanglan, kag ikaduha ang bulig pinansyal bangod sa tuman ka budlay nila nga sitwasyon.
Bisan gamay nga bulig, ang pasalamatan naman nila sang dako.
