Ginahalad sang Rank 2 sa November 2025 Philippine Nurses Licensure Examination nga graduate sa University of Saint La Salle (USLS) ang achievement sa tanan nga mga nagbulig kag nagsuporta sa iya.
Si Carl Andrew Soliva, nga residente sa Brgy Bata, Bacolod City ang nakakuha sang average ratings nga 93.60 percent.
Sa interview sang Bombo Radyo Bacolod kay Soliva, 210 tanan ang mga nagkuha sang board exam gikan sa USLS, kag 209 ang nakapasar ukon 99.52 percent kun sa diin 99.51 percent ang first taker.
Ang USLS ang nangin Top 6 Performing Nursing School man sa bilog nga Pilipinas.
Suno kay Soliva, nga summa cum laude sang maggradwar, antes paman handom na sini nga mangin top notcher.
Apang sang nagakuha na sang exam, aminado ini nga siya ang may pagpangduhaduha nga malab-ot ang handom, gani ginsalig nalang sini sa Ginoo ang tanan.// Suno diri, wala sa medical field ang iya mga ginikanan, apang siya ang may tiya nga nurse sa Estados Unidos.
Si Soliva ang nag-eskwela sang elementary sa La Consolacion College – Bacolod kun sa diin siya ang naggraduate nga Salutatorian.
Nagsulod ini sa Special Science Class sang Negros Occidental High School (NOHS), siya ang nakakuha sang High Honors kag nagsaylo sa USLS sang Senior High School, kun sa diin siya ang nag-Top 4 sa ila nga batch.
Ginpadayun sini ang pagtuon sa nasambit nga buluthuan sa pag-eskwela sang nursing, nga para sa iya pinakamaayo nga pre-med course.
Sa karun, ginapaminsaran pa sini kun padayunon ang handom nga mangin doktor bangod naluyagan naman sini ang nursing.
Dako ang pasalamat sini sa Ginoo, mga ginikanan, tanan nga nasudlan nga eskwelahan, mga professors, abyan kag ang review center.
Suno diri, dako gid ang nabulig sang tanan nga mga nasudlan nga eskwelahan nga nagtanom sa iya sang values kag naghatag sang kalidad nga pagtudlo.
Gincongratulate man sini ang tanan nga nakapasar, bangod nagbunga na ang ila pagpaninguha, samtang pahanumdom naman sini sa wala makapasar nga may plano ang Ginoo para sa ila.
