Nagpanaog sa pwesto ang mayor sang Maebashi sa Japan matapos makapila ka beses nga nagpadulong sa “love” hotels upod sa kasado nga senior city official.
Ginkumpirmar sang city assembly speaker ang resignation ni Akira Ogawa.
Sa X, ginpahayag ni Ogawa nga nadesisyunan niya ini matapos ginbaton ang mga opinion nga iya nakuha nagikan sa myembro sang city council kag sa ginpabutyag sang pumuluyo.
Sang Septyembre, gin-ako niya nga 10 ka beses siya nagpadulong sa love hotels upod ang kasado nga lalaki nga empleyado.
Ginpanginwala naman niya nga may romantic relationship sila kag naga-istorya lamang sila sa ila problema personal kag sa trabaho.
Sa report sang Japanese news agency nga Kyodo, nakabaton sang masobra 10,000 ka tawag ang syudad bangud sa amo nga issue.
Nagpangayo man ini sang pasaylo sa problema nga natuga niya sa iya mga staff nga wala sang kahilabtanan sa ila regular nga ubra.
Antes ini nag-resign, pito ka parliamentary groups sa Maebashi ang nagpanawagan sang iya resignation.
Nagdaog si Ogawa sa mayoral election sang Pebrero 2024 kag nangin pinakauna nga babayi nga mayor sang ciudad.
