Gindakop sang kalayo ang tatlo ka sako sang fireworks kag firecrackers sa bodega sang isa ka pamilya sa Purok Tuway, Brgy Canmoros, Binalbagan, Negros Occidental alas-7:18 kagab-i.
Sa interview sang Bombo Radyo Bacolod kay Fire Officer 1 Exxon Ylosorio, fire investigator sang Bureau of Fire Protection – Binalbagan, nabatun nila ang report alas-7:21 kag sila ang nakaabot sa area alas-7:28 sang gab-i.
Nahimo naman nga mapalong ang kalayo alas-7:38 sang gab-i.
Suno kay Ylosorio, ang storage room ang nahamtang sa sulod sang garahe, nga konektado man sa ila balay.
Ang mga firecrackers kag fireworks ang ginapahayag nga sang nakaligad pa nga tuig kag gintago lamang sa bodega.
Ginalantaw nga ini ang for personal consumption lamang kag indi para ibaligya.
Ginapakamaayo naman ni Ylosorio nga sementado ang bodega gani wala na naglapta ang kalayo.
Nagadangat naman sa P240,000 ang balor sang kahalitan.
Sa karun padayun pa ang imbestigasyon sa rasun sang sunog.
Paathag ni Ylosorio nga sarang dakpon sang kalayo ang pulbora kun tuman ka init, gani pahanumdom sini nga indi na magbilin sang palupok para sa masunod nga tuig.
