Nagdangat sa 373 ang mga pasahero kag driver kag 222 ka rolling cargoes ang nastranded sa mga pantalan sa Negros Occidental matapos mapaidalom sa Storm Signal No 1 ang dako nga bahin sang probinsya bangod sa Tropical Depression WILMA.
Sa interview sang Bombo Radyo Bacolod kay Lt Junior Grade John Hoffer Olis, Spokesperson sang Coast Guard Station Northern Negros Occidental, suspendido ang tanan nga byahe sang Barko padulong sa Cebu kag Panay bangod sa bagyo.
Ang mga nastranded nga pasahero ang temporaryo naman nga ginpatinir sa Education and Training Center School 3 (ETCS 3).
Samtang ang mga nagapuyo sa malapit ang ginpanugyanan na lamang nga magpauli anay.
Suno kay Olis, ang pagresume sang byahe sang barko ang nakadepende sa weather forecast.
Ginalantaw nga mahimo sa Lunes pa magakanay ang tyempo kag makabalik ang byahe sang barko.
Padayun man ang monitoring sang Coast Guard personnel sa mga baybayon, kag nagakoordinar man sa local Disaster Risk Reduction and Management Offuce sa preemptive evacuation sa mga nagapuyo malapit sa dagat, suba kag mga flood prone areas.
Sila ang nagakadto man sa mga fisherfolks association agud magpahanumdom nga likawan anay ang magpalawod kag maghatag sang mga abiso sa dapat himuon inkaso ma-alang alangan sa dagat.
