Patay ang isa ka lalaki matapos gintiro sa sulod mismo sang iya nga kwarto sa Zone 3, Brgy Conception, Talisay City, Negros Occidental alas-4:30 kaina sang kaagahon.
Ang biktima ang ginkilala nga si Jose Miguel Cuarte; samtang ang suspect ang ginkilala nga si Humero Besa alyas Bongbong, 50 anyos, balo, residente man sa lugar.
Matapos mabatun ang report tuhoy sa shooting incident, gilayon nga ginpadulungan sang Talisay City Police Station ang area, kag ila nga naabtan ang suspect nga yara pa sa sulod sang balay.
Natigayon nga manegosyar sang kapulisan si Besa tubtob nga ini ang nagsurrender.
Sa inisyal nga impormasyon gikan sa bayaw sang suspect, ini ang naga-init sang tubig upod sa residente sa kaingod nga balay sang magsulod ang suspect.
Nabatian nila nga naga-estoryahanay ang duha, tubtob nga nasundan sang paglupok.
Wala na sang kabuhi ang biktima sang masudlan sang kapulisan.
Sa interview sang Bombo Radyo Bacolod kay Police Lt Col Salvador Trono Jr, hepe sang Talisay City Police Station.
Gamit sang suspect ang sulpak ukon improvised shotgun, kag duha ka nagamit nga basiyo sang bala kag tatlo ka wala nagamit nga cartridges.
Ang suspect kag ang biktima ang indi man maghimata.
Sa karun, ginahulat pa sang kapulisan nga ma-estorya ang pamilya.
