Ginsuspender sang Sangguniang Panlungsod (SP) sa ciudad sang Cadiz ang Sangguniang Kabataan (SK) chairman sang Barangay Zone 6 bangud sa gina-alegar nga pagpagwa sang pondo nga wala nag-agi sa opisyal nga session.
Gindagdagan sang anum ka bulan nga suspensyon nga wala sang sweldo kag benepisyo si Reynaldo Loyd Bumagat, SK Chairperson sang Barangay Zone 6, Cadiz City, Negros Occidental sa paglapas sa Republic Act 7160.
Sa pahayag ni Cadiz City Mayor Salvador “Bading” Escalante, kinahanglan nga dugangan ang rules and regulations agud nga mausisa kun qualified ang magapamuno sa Sangguniang Kabataan (SK).
Suno sang Alkalde, ang gobyerno man sa gihapon ang balasulon kun wala nahatagan sang insakto nga supervision ang pagpaggwa sang pondo.
Ini ang may kaangtanan sa pag-ako sang SK Chairman, sa pagpagwa sang pondo nga wala naglabay sa SK council.
Ginlaygayan man sang alkalde ang SK Chairman, kag ginpahayag nga indi ini ang nagaisahanon nga nakahimo sang amo nga sala kundi damo pa apang wala lang nag-ako.
Suno kay Escalante, bisan ang mga kongresista, senador kag mayor ang nagahimo man sang sala, gani indi makatilingala nga ini ang nahimo sang SK chairman nga bag-o pa lang nakakapot sang kwarta sang gobyerno.
Pahayag sini nga dapat handa nga mag-atubang sang konsekwensya sang iya ginhimo ang SK chairman.
