Nagapamatok ang Sangguniang Kabataan sang barangay Felisa, sa ciudad sang Bacolod sa pag-aprubar sang Solid Waste Management Board sa request sang Victorias City nga maghaboy sang residual waste sa Bacolod sanitary landfill.
Sa interview sang Bombo Radyo kay Catherine Trespuentes, chairman sang SK sang barangay Felisa, may ginpatigayon na ini nga dialogue sa pila ka pumuluyo kag kalabanan nagapamatok sa plano nga ihaboy ang basura nga halin sa Victorias city sa ila barangay.
Suno diri, humalin pa sang tinalikdan nga nagareklamo ang mga tawo sa baho halin sa sanitary landfill.
Suno kay Trespuentes, nagpalibot sila sang signature campaign para mapa-untat ang proyekto kag indi nila mabaton nga ang barangay ang makabig na lamang nga basurahan.
Pahayag sini, mas maayo nga mapahibalo sang insakto ang mga pumuluyo bangod na-alarma na ang mga pumuluyo nga nabatian na lamang nila sa balita nga gin-aprubahan sang Solid Waste Management Board ang request sang Victorias city.
