Nag-antos sa grabe nga kasakit ang isa ka 23 anyos nga lalaki matapos nga ginhimo ang isa ka tradisyunal nga remedyo nga iya nakit-an online.
Dako ang pagtuo sang lalaki nga ginkilala nga si “Zheng” sang China, nga magahatag sang mirakulo ang pagbutang sang linta sa sulod sang iya nga lawas.
Indi maathag kun ano ang nagduso sa lalaki para himuon ang nasambit nga remedyo, apang ginpadayun gid niya ini gani gilayon nga nagpangita kag nagbakal sang linta.
Matapos nga makabakal sang linta, ginsunod niya ang pagsulondan sa online kag gindasok sa iya nga barukan ang lima ka sentemetro nga linta pinaagi sa iya nga urethra.
Nagresulta sa pagbara sang uretra ni Zheng ang nasambit nga procedure nga nagtuga sang kasakit kag imposible na nga magpangihi.
Samtang ang linta ang wala nagpabilin sa iya nga urethra, nagpanaug ini sa iya nga barukan kag nagtapik sa mga sensitibo nga bahin sang iya kasudlan kag nagpagguwa sang mga anticoagulants.
Nagdesisyon si Zheng nga magpadulong sa ospital bangod indi na maantos ang kasakit.
Natingala gid ang mga doktor sa ekplenasyon ni Zheng kun ngaa nagapasakit ini.
Nakumpirmar sa ultrasound nga may yara gid sang linta sa sulod sang iya nga barukan.
Gilayon naman nga ginpatigayon ang operasyon agud makakas ang linta sa iya nga sistema.
Nangin madinalag-on ang operasyon kag nasalbar ang kabuhi sang lalaki kag nakapangihi na ini sang normal.
Pahanumdom sang otoridad nga indi maghimo sang butang nga wala sang sayantipiko nga basehan kag posible nga makadaot pa gid sa lawas.
