Nasuguran na ang construction sang bag-o nga Bacolod Police Station 3, nga ginalauman nga mangin pinakamatahom nga Police Station sa Bacolod City.
Madumduman sang kabudlayan sa lokasyon sang estasyon bangod ini ang nahamtang sa suludlon nga lugar, gani ginpangitaan sang masayluhan nga mas accessible nga lugar.
Sa interview sang Bombo Radyo Bacolod kay Bacolod City Police Office Director Police Col. Joeresty Coronica, ginalauman nga matapos ang construction sa sulod sang lima tubtob anom ka bulan, sa Hulyo ukon sa Agosto.
Nahibaluan nga nakaangkon man sang delay sa construction bangod may-ara sang nangin pagbag-o sa design.
Ang duta ang gindonar naman sang Rockwell.
Suno kay Coronica, P10.5 million ang budget sang Philippine National Police para sa 2-storey PNP Standard Building.
Una nga nagkomiter si Congressman Alfredo “Albee” Benitez nga dugang sini ang budget sang magpatigayon sang ground breaking, apang sang mabatian sang chairman sang Rockwell, sila na lamang ang nagpledge nga magdugang sang P10 million.
Gani ang 2-storey PNP building ang nahimo nga 3-storey, nga ginalauman nga amo ang mangin pinakamatahom nga Police Station sa Bacolod City.
