Pito ka mga indibidwal ang kumpirmado nga napatay samtang 82 naman ang na-missing matapos nagluntad ang landslide sa Pasirlangu Village, West Bandung, West Java, Indonesia.
Natabo ang insidente sang alas-2:00 sang kaagahon kahapon (Enero 23), matapos ang mabaskog nga pag-usmod sang duta sa bahin sang Mount Burangrang bangud sa mabaskog nga pag-ulan.
Masobra 30 ka panimalay ang natabunan sang duta kag lapok, nga nagtuga sang halit sa komunidad.
Ginpangunahan sang National Disaster Mitigation Agency (BNPB) ang search and rescue operations, kaupod ang Armed Forces of Indonesia, lokal nga pamunuan kag mga volunteers.
Nangin mabudlay ang operasyon bangud sa padayon nga pag-ulan kag peligro sang dugang nga landslide sa lugar.
Luwas sa landslide, ginbaha naman ang 20 sa 30 ka sub-districts sang Karawang kag pila ka bahin sang East Jakarta, rason nga nag-evacuate ang ginatos ka mga residente.
Suno sa pamunuan, nagdugang sa peligro sang kalamidad ang deforestation kag environmental degradation, gani ginpasaka ang kaso batok sa anum ka kompanya nga ginapatihan nga responsable sa pagkaguba sang palibot.
