Nagapanawagan ang lola sang tatlo ka menor de edad nga ginlampusan sang bato sa Hacienda Badiang, Barangay E-Lopez, Silay City nga mahatagan sang hustisya ang natabo sang iya nga mga apo.
Nahibaluan nga ginbawian sang kabuhi ang 9-anyos nga babayi, samtang kritikal naman ang kondisyon sang duha ka utod sini nga 14 anyos nga babayi kag apat ka tuig nga lalaki.
Sa interview sang Bombo Radyo kay Mary Jean Ansiano, 53-anyos, lola sang mga kabataan sa side sang iloy, tuman ang kasubo nga nabatyagan sini kag indi siya makatulog matapos ang natabo sa iyang mga apo ilabi na nga siya ang nagtindog bilang iloy sang mga ini.
Nahibaluan nga ang iloy sang mga biktima ang nagatrabaho sa luwas sang pungsod.
Suno kay Ansiano, ang 11 anyos nga utod sang mga biktima ang sa iya balay nagtulog.
Nabalaka pa ini sa mga apo nga nabilin sa ila balay sang maglabay ang Bagyo sa kahangawa nga matumbahan sang kahoy ang ila balay, apang wala ini nagdahom nga lain ang matabo.
Suno kay Ansiano, wala gid siya sang ideya kun sin-o ang may kahimuan sang krimen bangud ang amay sang mga bata ang wala man sang kontra.
Nagapanawagan si Ansiano sa naghimo sa krimen nga mag-surrender na sa mga kapulisan.
Nag-abot naman ang iloy sang mga biktima nga si Ronelyn Montañez kagab-i sa Corazon Locsin Montelibano Memorial Regional Hospital (CLMMRH).
