Nasapwan ang bangkay sang 11-anyos nga bata nga lalaki nga nakalubong sa balas sa Brgy. Tiling, banwa sang Cauayan pasado alas-3:00 kahapon sang hapon, Pebrero 9.
Ang biktima ang isa ka Grade 4 pupil kag residente sang nasambit nga lugar.
Nahibaluan nga nagahampang sa kilid sang baybay ang biktima antes gindeklarar nga missing.
Suno sa tiya sang biktima, nadula ang bata alas-6:00 sang gab-i, Pebrero 8.
Samtang ginapangita sini ang iya nga hinablos, nakita sang tiya ang tsinelas sang bata sa higad sang baybay kun sa diin ini ulihi nga nakita nga nagahampang.
Nagdesisyon siya nga kutkuton ang balas sa lugar kag didto nakita ang lawas sang iya hinablos nga wala na sang kabuhi.
Sa karun, padayon pa ang imbestigasyon sang kapulisan agud matumod kun ano ang motibo sang krimen.
