Nagasampaw sampaw ang palas-anon sang amay sang napatay matapos gintiro sa Gastuslao Street, Brgy 9, Bacolod City sa atubang sang isa ka mall kagab-i.
Madumduman nga ginluthang kagab-i sang wala pa matumod nga suspetsado ang mag-angkasanay sa motorsiklo, kun sa diin napatay ang backrider nga si Christian Sarsona alyas Krung Krung, 18 anyos, samtang pilason naman ang driver nga si Alyas Noknok.
Sa interview sang Bombo Radyo Bacolod sa amay nga si Clint Sarsona, e-bike driver kag residente sang Brgy 6, Bacolod City, may nagpahibalo lang sa iya sa natabo nga shooting incident, kag gilayon man ini nga nagtamwa.
Nakibot ini sang makita nga ang iya bata nga natalana pa kuntani nga magdul-ong sa iya sang kwarta si Krung Krung agud ibakal sang gatas sang iya hinablos.
Suno diri, si Krung Krung ang naga-estar sa balay sang iya magulang nga si Alyas Kring Kring.
Apang ini ang wala na nagpauli kag nag-upod upod kay Noknok humalin sang madakpan ang iya magulang kag bana sini sa drug buybust operation.
Si Krung Krung ang sang Disyembre 2025 lamang nakagwa sa Social Development Center matapos marehab bangod sa kaso nga carnapping sang Setyembre 2025.
Suno sa amay, sang Enero 19 lamang nag-18 anyos ang iya bata.
Aminado ang amay nga may mga record na sang pagpangawat si Krung Krung sa Bacolod Police Station 2, apang nagpinsar ini nga nagbag-o na ang iya bata matapos marehab.
Sa impormasyon sang Bombo News Team, ang duha ka biktima ang ginatudlo nga nagapanghold-up sang dalagko nga mga salakyan gani nakuha sa paghinakop sang mga ini ang cal. 38 revolver.
Wala naman sang ihibalo ang amay sa mga illegal nga aktibidad sang iya bata, kag suno diri madamo sang gina-updan nga barkada si Krung Krung.
Suno sa amay, wala pa matapos ang iya problema kay Kring Kring nga yara sa prisuhan, kag ini ang nasundan naman sang pagkamatay ni Krung Krung.
Napahibalo naman sini ang iloy sang biktima nga ngapuyo sa banwa sang Cauayan kag may kaugalingon na nga pamilya.
Handa naman nga magpasaka sang kaso ang amay sa tion nga matumod na ang suspetsado.
