Nagdangop sa Ipa-BOMBO Ta segment sang Bombo Radyo Bacolod si Jether Regodoz, 61-anyos, Local Chairman sang Buaya Farmers Fisherfolks Association sa Sicogon Island, agud ipabutyag ang kahimtangan sang mga pumuluyo sa isla.
Reklamo sini nga sang 2014 may nagpakita nga interesado nga developer sang Ayala Development Corporation sa Sicogon Island agud suno diri pasanyogon ang lugar bilang sentro sang turismo kag nagpasalig nga hatagan sang pangalabuhian kag suporta ang mga pumuluyo.
Apang suno kay Regodoz, naglab-ot nalang sa 2026, wala pa gid sang may natuman sa ila mga ginpromisa.
Indi sila makapatindog sang balay ukon makapa-impubar sa ila balay bangod ang nasambit nga kompanya ang gilayon nga nagapadala sang notice to vacate.
May yara karon sang masobra 1,900 ka pumuluyo sa isla, kag kadam-an sa ila ang nagasalig sa pagpangisda bilang napanguna nga palangabuhian.
Bangud sini, ginakahangawa sang mga pumuluyo nga sila ang pahalinon sa palaabuton.
Panawagan ni Regodoz sa kompanya kag sa mga opisyales diri nga tumanon ang mga ginpasalig sang 2014.
Luyag sang mga tumandok nga makabaton sang maayo nga pangalabuhian, kag mabatyagan nga kabahin sila sang ginahambal nga operasyon sa pag-uswag sa isla.
