May tatlo na ka Negrosanon sa Middle East ang nagpabutyag nga luyag na nila magpauli sa Pilipinas.
Suno kay Negros Occidental Provincial Administrator Atty. Rayfrando Diaz, ang Overseas Filipino Workers help desk sa provincial capitol nakabaton na sang pito ka mensahe gikan sa mga OFW sa Middle East.
Apat diri ang naghatag sang update sang ila sitwasyon kag sang ila mga contact details samtang may tatlo naman nga nagpabutyag nga luyag na nila magpauli.
Suno diri, sa tatlo may duha nga residente sang banwa sang Pulupandan kag isa sa ciudad sang Himamaylan.
Dugang pa sini, ang duha nagatrabaho sa Kuwait samtang ang isa yara sa Saudi Arabia.
Suno kay Diaz, napadala na nila ang ila mga pangalan sa opisina sang Overseas Workers Welfare Administration (OWWA) kag kun makapauli na sila, may yara sila sang mabaton nga assistance gikan sa provincial government.
Samtang, may isa nga residente sang banwa sang Isabela nga nastranded sa Manila kasunod sa nagluntad nga kinagamo sa Middle East.
Siya yara na sa Hong Kong apag ginpabalik sa Manila kag didto nangayo ini sang bulig nga makabalik sa probinsya.
Mahibaluan nga santo sa record sang OWWA, 16,623 ka mga Negrosanon ang yara sa Middle East.
