Ginpatpat sang labor advocate ang malala nga epekto sa ekonomiya partikular na sa mga mangunguma sa tuman nga pagsaka sang presyo sang gatong dala sang padayun nga gyera sa Middle East.
Sa interview sang Bombo Radyo Bacolod kay General Alliance of Workers Association Secretary-General Wennie Sancho, kun magpadayun ang konflikto, ini ang makatuga sang pagtaas sa sukot sa kuryente, inflation, kag economic instability.
Ginalantaw sini nga ang two to four percent inflation sa Pilipinas ang mahimo magtimbook sa 5 percent.
Ginakahangawa sini ang padayun nga pagsarurot sang balor sang peso batok sa dolyar.
Isa sa mga lihok nga nakita sini nga mahimo sang gobyerno amo ang pagbuhin sa fuel excise tax, value added tax kag paghatag sang subsidiya sa transport sector.
Pahanumdom sini nga indi na dapat maghulat ang local government sang mandato gikan kay President Ferdinand Marcos Jr. bangod sila ang may gahom sa pagpatuman sang Energy Conservation Program.
Suno diri, dapat may-ara sang task force nga makapatigayon sang fuel survey sa mga gasoline stations.
Ini agud malikawan ang pagpamintaha sang mga unscrupulous businessman nga apisar nga old stocks pa ang ginabaligya, mahimo nga magpasaka na sang presyo.
Dugang pa sini nga kun magtaas ang inflation rate kag magnubo ang value sang peso batok sa dolyar, magacollapse man ang purchasing power sang mga mamumugon.
Suno diri, ang minimum wage ang indi nagid maka-igo sa panginahanglanon.
Isa sa nakita sini nga matabo amo ang pagdemand sang fare hike sang transport groups, kasubong man ang wage increase sang mga workers.
Apang mahimo man ini nga magtuga sang pagbuhin sang mga negosyante sang empleyado, nga magapataas sa unemployment rate.
Kasunod na sini ang pagluntad sang social unrest, ukon kilos protesta batok sa gobyerno.
