Nabunggoan sang nag-overshoot nga canter truck ang duha ka senior citizen nga babayi nga nagahulat sa kilid sang dalan sa Alijis – Murcia road, Brgy. Singcang-Airport, Bacolod City, sang Miyerkules alas 4:38 sang hapon.
Ang mga biktima ang ginkilala nga sanday Gretel Villadolid, 67 anyos, kasado kag residente sang Donia Juliana drive, Brgy. Taculing, Bacolod City; kag Teresita Casiano, 76 anyos, single kag residente sang San Sebastian, Brgy. Sum-ag, Bacolod City.
Samtang ang driver naman sang Mitsubishi canter truck amo si Faustino Dugenio, 66 anyos, kasado kag residente sang Prk. Puentebella, Brgy. Alijis, Bacolod City.
Sa interview sang Bombo Radyo Bacolod kay Police Major Elmer Bonilla, head sang Bacolod City Traffic Enforcement Unit, nagahulat ang duha ka tigulang nga babayi sa kilid sang dalan sang hinali lang naglapaw sa gutter ang canter truck kag nagderetso sa ila kag nabunggo sa poste.
Bangod sa impact, nadulaan sang kabuhi si Villadolid samtang pilason naman si Casiano kag ang driver nga si Dugenio.
Suno kay Bonilla, si Dugenio magapangatubang sa kaso nga Reckless Imprudence Resulting in Homicide, Physical Injury, kag Damage to Property.
