Indi magpatuman sang saka sa pletehan ang transport group nga Bacolod Alliance of Commuters, Operators, and Drivers (BACOD-Manibela) sa pihak sang fare hike nga gin-aprubahan sang Land Transportation Franchising and Regulatory Board (LTFRB).
Apang nagaayo lamang sila sa Local Government Unit sang Bacolod City nga mahatagan sila sang ayuda.
Sa interview sang Bombo Radyo Bacolod kay BACOD-Manibela President Rudy Catedral, nagapati ini nga wala man sang magareklamo batok sa ila bangud sa under-charging kag indi man ini unfair para sa iya, bangud ang ila himuon ang pabor man para sa mga commuters.
Nagpahibalo na sila sa ciudad nga luyag nila nga makighinun-anon kay Bacolod City Mayor Greg Gasataya.
Nakasabat naman ang sekretarya sang alkalde nga ipaschedule na lamang ang ila nga meeting.
Dugang pa sini nga sa LGU nalang sila magapangayo sang ayuda bangud indi sila maqualify sa fuel subsidy nga P5,000 sang LTFRB.
Ini bangud wala sila nakarenew sang ila nga prangkisa.
Ginpahayag pa sini nga kuntani salamahon nalang ang paghatag sang ayuda bangud indi man nila sala kun ngaa wala narenew ang ila nga prangkisa kag palareho lang man sila nga nagagamit sang produktong petrolyo.
