LTFRB, magadihon sang rekomendasyon sa pagpasaka sang plete sa masunod nga bulan

Ginalauman nga magadihon na ang Land Transportation Franchising and Regulatory Board (LTFRB) sang rekomendasyon angot sa mga proposal nga pasakaan ang plete sa masunod nga bulan.

Ini sa tunga sang padayon nga pagsaka sang presyo sang gatong.

Suno kay Department of Transportation (DOTr) Secretary Giovanni Lopez, ginmanduan na niya ang LTFRB nga magpasa sang ila rekomendasyon sa labing madali nga tion agud may bastante nga oras ang ahensya sa pagtuon sang ginaduso nga fare hike.

Madumduman nga sini nga semana, nagpatigayon sang duha ka adlaw nga nationwide strike ang transport group nga Manibela bangud sa epekto sang pagsaka sang presyo sang gatong sa kita sang mga driver.