Nagpanindugan si Bacolod Alliance of Commuters, Operators and Drivers-Negros Island (BACODNI)-Manibela President Rudy Catedral nga ang pagpatuman sang P1 nga fare hike sa public utility jeepneys ang indi solusyon sa ginapangatubang nga problema sang transport sector nga sobra kataas nga presyo sang produktong petrolyo.
Kagab-i nagpagwa sang abiso ang Land Transportation Franchising and Regulatory Board (LTFRB) ng aprubadong pamasahe para sa mga Public Utility Jeepney (PUJ).
Yari ang aprubado nga pamasahe para sa Public Utility Jeepneys (PUJ).
Para sa tradisyonal nga mga jeepney, ang pamasahe sa una nga apat ka kilometro amo ang P14 kag dugang nga P2 sa kada masunod nga kilometro.
Samtang, para sa modern jeep, ang pamasahe sa una nga apat ka kilometro amo ang P17 kag dugang nga P2.40 sa kada masunod nga kilometro.
Ang implementasyon sang pagsaka sang pamasahe ang magasugod sa Lunes, Setyembre 28, 2026.
Sa interview sang Bombo Radyo Bacolod kay Catedral, indi sila sugot sa pagpasaka sang pamasahe bangod wala man sang pagsaka sa sweldo sang mga commuters, samtang ang mga drivers ang may mga pamilya man nga nagasakay kag nagaplete sa jeep.
Panawagan sang mga ini nga dapat mahimuan sang gobyerno sang tikang nga makakas ang Value Added Tax, Excise Tax kag ang Oil deregulation law agud nga masolusyunan ang ila ginapangatubang nga problema sa tuman kataas nga presyo sang produktong petrolyo.
Suno kay Catedral nga meetingon man niya ang miyembro sang BACODNI-Manibela nga indi magtuman sang saka sa pletehan bangud ang sweldo ang wala nagasaka kag ang mga kabataan kag pamilya nila nga driver ang apektado man.
Nagapanawagan man ini sa gobyerno nga kun may ayuda nga ihatag dapat tanan ang makabaton.
Aminado man ini sa iya paglantaw ginapaboran sang gobyerno ang modernized jeep bangud P20,000 ang nakuha subsidy samtang ang traditional ang nakabaton P5,000 apang indi pa tanan ang nakabaton.
