Patay ang isa ka 49 anyos nga lalaki matapos nga gintiro sang wala makilal-an nga suspetsado sa Sitio Lapak, Brgy. Robles, La Castellana, Negros Occidental, kaina sang hapon, Marso 20, 2026.
Ginkilala ang biktima kay Julio Calo, 49 anyos kag residente sang nasambit nga lugar.
Sa interview sang Bombo Radyo Bacolod kay Police Major Romulo Gepilango, hepe sang La Castellana Municipal Police Station, imbestigasyon sang mga kapulisan, nagatindog ang biktima sagwa sang balay sini sang may maglabay nga puti nga SUV halin sa La Carlora nga direksyon.
Nagpundo sa atubang sang balay sang biktima kag gintiro ini sang wala makilal-an nga suspetsado.
Dead on the spot ang biktima.
Gintinguhaan man nga malagas ang salakyan sang ginatudlo nga suspek ang apang wala ini maabtan,
Suno kay Gepilango, ginpahayag sang mga residente nga nakabati sang madamo nga lupok sang armas-luthang.
Ang biktima ang nakaagi man dakop sa kaso nga may kaangtanan sa illegal nga druga sang October 5, 2018 kag ini ang isa sa ginalantaw nga motibo sa pagpatay.
Suno kay Gepilango, ang biktima ang isa ka job order sa ciudad sang Himamaylan, Negros Occidental
Sa karun padayon ang imbestigasyon sang mga kapulisan agud nga matumod ang suspetsado para maaresto kag motibo sa pagpatay sa biktima.
