Nagapanawagan ang La Castellana Municipal Police Station sa publiko para sa bulig kag kooperasyon angut sa pag-imbestigar sa nagluntad nga shooting incident sa Sitio Lapak, Brgy. Robles, La Castellana, Negros Occidental, nga nagresulta sa kamatayon sang isa ka lalaki nga ginkilala nga si Julio Calo, 49 anyos.
Sa interview sang Bombo Radyo Bacolod kay Police Major Romulo G. Gepilango V, hepe sang La Castellana Municipal Police Station, ginapangita sang kapulisan ang posible nga eyewitness ukon mga establisyemento nga may CCTV camera nga mahimo nakahagip sa puti nga SUV nga gin-alegar gingamit sang suspetsado sa pagpalagyo.
Suno diri, nagpalagyo ang suspek padulong sa direksyon sang La Castellana proper.
Gindeklarar man ang hot pursuit operation kag ginbutang sa red alert status ang kapulisan agud madali nga matumod kag madakpan ang responsable sa krimen.
Padayon ang imbestigasyon sang kapulisan agud mahibaluan ang motibo sa krimen kag makilal-an ang suspetsado.
Pahayag ni Gepilango, bisan ano nga impormasyon angut sa insidente ukon sa puti nga SUV ang dako gid nga bulig sa pag-hulag sang kaso.
