Bangud sa tuman nga pagsaka sang presyo sang gatong subong, makapaminsar ka nalang sang iban pa nga pamaagi agud mapa-andar ang imo salakyan.
Kaangay lang sa gin-imbento sang isa ka driver sa Cuba nga imbes nga gasolina, uling ang ginabutang niya sa iya salakayan agud ini ang mag-andar.
Kasunod ini sa kabudlayan sa supply sang produktong petrolyo sa ila pungsod.
Suno sa report, ginpahayag nga ang pag-convert sa uling nagikan sa paggamit sang gasolina sa salakyan ang ginhimo ni Juan Carlos Pino.
Suno kay Pino, luwas nga mas barato ang uling sangsa gasolina, ginpahayag sini nga mas madamo man sang supply sang uling sa ila.
Gintakdan ni Pino sang container ang likod sang iya salakyan nga nagaserbe nga converter kag filter sang mga uling.
Madinalag-on siya nga nakabiyahe sa ila nga komunidad gamit ini.
Nahibaluan nga nangin mabudlay ang supply sang gatong sa Cuba matapos ginbalabagan sang America ang oil shipments gikan sa Venezuela halin sang Enero.
