Ginpaandaman sang Department of Labor and Employment (DOLE) ang tanan nga mga employer natuhoy sa insakto nga pagpasweldo sa regular kag special non-working holidays sini nga bulan sang Abril.
Ini suno sa ginpagwa nga advisory sang DOLE para sa Huwebes Santo sa Abril 2, Biyernes Santo sa Abril 3, kag Araw ng Kagitingan sa Abril 9, lunsay gin-deklarar nga regular holidays, pati man ang Sabado de Gloria ukon Black Saturday sa Abril 4, nga gin-deklarar naman nga special non-working holiday.
Pahanumdom sang DOLE nga kinahanglan sundon sang mga employer ang mga patakaran sa pagpasweldo sa regular holidays, kun sa diin ang mga empleyado nga nag-trabaho sa sini nga mga inadlaw ang dapat makabaton sang doble nga bayad para sa una nga walo ka oras.
Kwalipikado man nga makabaton sang bayad ang empleyado nga wala nagtrabaho sa mismo nga regular holiday, apang sa kondisyon nga nag-trabaho ukon naka-leave of absence with pay ini isa ka adlaw antes sang holiday.
Ang mga empleyado naman nga magatrabaho sa adlaw nga gindeklarar bilang special non-working holiday ang dapat makabaton sang dugang nga 30% sa ila nga basic wage sa una nga walo ka oras, kag kun maglapaw sa walo ka oras, dapat makabaton pa gid sang dugang nga 30% sa ila nga sweldo.
