Gin-athag sang battalion commander sang 47th Infantry Battalion sang Philippine Army nga nagsunod sa proper procedure ang pag-hold nila sang isa ka residente nga nakita sa lugar kun sa diin nagluntad ang engkwentro sa tunga sang militar kag New People’s Army kahapon sang aga sa Brgy Masaling, Cauayan, Negros Occidental.
Sa interview sang Bombo Radyo Bacolod kay Lt Col Dennis Martinez, Commander sang 47th Infantry Battalion sang Philippine Army, gin-hold lamang si Jose Jayford Escamilla, 36 anyos bangud sa pila ka mga palamangkutanon kaangay sang kun taga diin ini kag nagsabat nga tumandok sang Candoni apang nakapangasawa sang residente sang Cauayan.
Suno kay Martinez, matapos nga maathagan ang mga suldado gin-release man siya gilayon kag nakapauli man ini gilayon sa ila pamilya.
Samtang madamo naman sila sang nakumpiskar gikan sa encounter site ang ginlakipan sang duha ka long magazine sang 5.56 rifle; isa ka short magazine sang KG9 rifle; 73 rounds sang 5.56mm; duha ka hand grenade, isa ka Commercial radio nga may charger; Hammocks ukon duyan, Ponchos; Backpacks; Bandolier kag iban pa nga personal nga pagkabutang.
Ginalantaw nga may nasamaran sa grupo sang New People’s Army sa nagluntad nga engkwentro bangud sa tinulo sang dugo sa lugar.
Nagluntad ang engkwentro bangud samtang nagapatrolya ang 47th IB sa lugar, may pumuluyo nga nagreport tuhoy sa presensya sang armado nga grupo.
Ang bayluhanay sang lupok ang naglawig sang kapin lima ka minutos, apang wala pa ma-account kun pila ang nakasumpong sang militar.
Nagapati si Martinez nga ang na-engkwentro kahapon amo man ang grupo nga na-engkwentro nakaligad sang 15th Infantry Battalion.
Sa karun padayun pa ang pursuit operation sang mga militar sa nagpalagyo nga mga rebelde.
Wala naman sang napilasan sa tropa sang gobyerno.
