Suportado sang Department of Energy (DOE) ang ginaduso nga hagna nga kakson ang value-added tax (VAT) sa kuryente bilang kabahin sang mga tikang agud mabuhinan ang galastuhon sang mga konsumedor apang ginpahayag nga kinahanglan pa ini pagatun-an sang maayu.
Suno kay Energy Secretary Sharon Garin, ginasuportahan sang DOE ang tanan nga mga tikang nga nagatuyo magpanubo sang presyo sang kuryente sa pungsod, lakip na ang posibilidad nga buhinan ukon kuhaon ang VAT sa kuryente.
Paathag sini, mapanubo ang presyo sang kuryente kun kakson ang VAT apang suno diri, kinahanglan pa ini sang dugang nga evaluation kag indi lamang ang DOE ang mga desisyon sini.
Sang Lunes, nag-file si Senadora Risa Hontiveros sang hagna nga nagatuyo kakson ang VAT sa system loss charges sa mga balayran sang kuryente.
Ang Senate Bill No. 2076 nagatuyo nga mag-amyenda sang National Internal Revenue Code (NIRC) agud ma-exempt ang system loss charges sa VAT, kasunod sang mga report sang pagsaka sang presyo sang kuryente ilabi na gid sa tion sang tig-ilinit.
