Pormal na nga gin-elect bilang bag-o nga presidente sang Senado si Senator Alan Peter Cayetano sa ginpatigayon nga botohay sa plenary session sang upper house kahapon, Mayo 11.
Sa kabug-usan nga 24 ka senador nga nagtambong sa sesyon, nakakuha si Cayetano sang 13 ka boto, supisyente na agud buslan si “Tito” Sotto III nga nakakuha sang siyam ka boto.
Kalakip sa mga nagboto pabor kay Cayetano magluwas sa siyam nga kaupdanan sa minority bloc amo ang iya utod nga si Senator Pia Cayetano kag ang mag-utod nga sanday Sen. Camille kag Mark Villar.
Ang siyam nga Senador naman nga nagboto kay Sen. Sotto amo sanday Sen. Bam Aquino, Win Gatchalian, Risa Hontiveros, Panfilo Lacson, Lito Lapid, Kiko Pangilinan, Raffy Tulfo, Erwin Tulfo kag Tito Sotto.
Samtang duha naman ka senador ang nag-abstain kalakip sanday Sen. JV Ejercito kag Sen. Juan Miguel Zubiri.
Si Cayetano na ang ikaapat nga lider sang Senado sa idalom sang administrasyon ni Marcos.
Madumduman nga una nga nagserbe bilang Senate President si Sen. Juan Miguel Zubiri sa pag-umpisa sang administrasyon, nga ginsundan ni Sen. Francis “Chiz” Escudero sang 2024, kag Sen. Tito Sotto sang 2025.
Natabo ang pag-ilis sang liderato sa tunga sang mainit nga topiko natuhoy sa Articles of Impeachment batok kay Vice President Sara Duterte.
