Hugot nga ginpanginwala ni Senator Juan Miguel Zubiri ang mga alegasyon ni former Department of Public Works and Highways (DPWH) secretary Manuel Bonoan partikular ang pahayag nga nag-uyat ini ukon nagdumala sang mga listahan sang mga project request sang mga senador.
Suno kay Zubiri, bilang Senate President, wala gid ini nagpangabay, ukon nag-handle sang bisan ano nga listahan sang mga project requests gikan sa mga senador.
Ginpahayag man niya nga wala sang proposed budget amendments nga nag-agi sa iya talatapan.
Panindugan sini nga nagaagi tanan nga requests sa Senate Committee on Finance, nga nagadumala sa budget process sang Senado.
Apang, ginpahayag ni Zubiri nga wala ini sang may nakita nga malain sa institutional amendments para sa mga kalsada, taytay, mga airport, seaports, kag iban pa nga critical infrastructure, basta ini ang gin-aprubahan sang implementing agency, maayo nga naimplementa, kag wala sang personal interest ukon korapsyon.
Ginpanginwala man ni Senator Bong Go ang alegasyon ni Bonoan tuhoy sa pagsumiter sang listahan sang mga proyekto kay former DPWH undersecretary Roberto Bernardo.
Suno kay Go, nabudlayan ini maghatag sang komento sa isyu nga indi maathag ang basehan kag motibo sang alegasyon.
Suno diri, dapat tutukan ni Bonoan ang kun paano mapakigbato ang kaugalingon sa baylo nga i-involve ang trabaho sang mga senador sa iya nga problema.
Ginpanindugan ni Go nga wala siya may ginsumiter nga anuman nga listahan kay Bernardo.
Nagpabutyag naman si Senator Robin Padilla sang iya sentimyento nga sila ang “less privileged” nga mga senador ni Go kag kabahin sang oposisyon nga “nagapanglimos” lamang sang pondo.
Samtang, ginpahayag naman ni Senator Imee Marcos nga wala ini sang ihibalo natuhoy sa alegasyon ni Bonoan nga gin-alegar nagpasalamat sila ni Padilla sa “assistance” ni Bonoan.
Suno diri, masami ini nagapasalamat sa mga departamento kada may mga proyekto nga gin-implementa sa Ilocos Norte.
Dugang pa niya, kasimanwa niya si Bonoan apang wala ini sang ideya kun ano nga partikular nga “pasalamat” ang ginatumod sang anay DPWH secretary.
