“Fuel, Food and Inflation” ang nangin focus sa tatlo ka adlaw nga 35th Visayas Area Business Conference sa Bacolod City.
Ang aktibidad ang ginhost sang Metro Bacolod Chamber of Commerce and Industry, kalakip sa pasidunggan nga 35 Business Icons of the Visayas si Dr. Rogelio M. Florete, Chairman sang Bombo Radyo Philippines.
Sa interview sang Bombo Radyo Bacolod kay MBCCI Chief Executive Officer Frank Carbon, nagalaom ini nga matutukan sa conference ang mayor nga panginahanglanon sa Pilipinas, partikular na sa Visayas.
Ang aktibidad ang nagsugod sang Mayo 13 kag magatakop karun sa gab-i, kag ang mayor nila nga focus amo ang food security and agriculture, fuel and logistics, kag food and industry.
Isa sa ginaduso ni Carbon amo ang agro-industrialization.
Suno diri, sa karun gikan sa mga raw agriculture products, ini ang ginaderetso na sa service sector.
Panindugan sini nga mas maayo kun may manufacturing ukon food processor sa Visayas.
Pinaagi sini, ginalantaw nga madamo ang magenerate nga trabaho, maseguro ang food security, kag mas dako ang maganar gikan sa mga produkto.
Apang aminado si Carbon nga antes mapatuman ang agro-industrialization, kinahanglan man sang secured nga power supply.
Ginalauman nga sa pagtakop sang conference, sila ang makahuman sang mga resolusyon, nga amo naman ang ila ipalab-ot sa mga ahensya sang gobyerno agud mahatagan sang pagtamod.
Tinutuyo nila nga mapakita ang “one visayan voice” agud mas pamatian sang mga yara sa gobyerno.
