Nabaton na sang provincial government sang Negros Occidental ang napermahan na nga deed of donation sa P10 million nga financial assistance gikan sa Office of the President para sa mga biktima sang bagyo Basyan.
Madumduman nga sang Pebrero, pila ka Local Government Units ang naapektohan bangod sa lapnagon nga pagbaha tuga sang bagyo BASYANG kag sang shearline.
Suno kay Negros Occidental Provincial Administrator Atty. Rayfrando Diaz, tuman nga naapektohan sang bayo ang first kag second district sang probinsya nga ginalakipan sang LGU sang Sagay City, Calatrava, Toboso, Escalante City, Cadiz City, EB Magalona, kag Talisay City.
Suno diri, magakonsulta sila sa LGUs kun luyag nila nga cash ukon goods ang batonon nga assistance.
Sa karun, ginatipon na ang report angot sa halit nga ginbilin sang kalamidad.
