Nagpagwa sang mas detalyado nga timeline ang Pasay City Police, Criminal Investigation and Detection Group (CIDG), kag National Bureau of Investigation (NBI) angot sa natabo nga insidente sang pagpangluthang sa sulod sang Senado sang Mayo 13 sa tunga sang tensyon sa impeachment case batok kay Vice President Sara Duterte.
Antes ang insidente, nagpatigayon sang serye sang security preparations kag inspeksyon sa GSIS complex kag sa Senado bangud sa ginalauman nga pag-aresto kay Senator Ronald “Bato” Dela Rosa kag sa pag-abot sang Articles of Impeachment naggikan sa Kamara.
Ginpatuman ang total lockdown sa Senado matapos ginpahayag sang Office of the Sergeant-at-Arms nga may i-arestuhon sa sulod sang building.
Makaligad ang pila ka minuto matapos madul-ong ang Articles of Impeachment, nabatian na ang serye sang mga lupok sa sulod sang Senado.
Sa ginpagwa nga report sang NBI, ila ginpahayag nga may mga ahente sila nga naka-deploy sa pila ka mga “vulnerable areas” sa GSIS compound bilang kabahin sang security inspection nga gin-alegar ginahingyo sang GSIS management.
Isa sa mga lugar nga ginbantayan amo ang hallway padulong sa Kalayaan Garden sa diin nagluntad ang komprontasyon sa tunga sang pila ka mga NBI agents kag security personnel sang Senado.
Santo sa timeline, may yara na sang “lock and load” order antes ang engkwentro.
Matapos ang insidente, gin-alegar nag-atras ang pila ka mga security personnel samtang nagpatigayon naman sang evasive maneuvers ang target nga mga NBI agents.
Ginpanginwala naman sang NBI na imbolbado ang ila personnel sa pagpangluthang matapos ginbuyagyag sang pila ka mga opisyal sang senado nga may mga “perceived NBI agents” nga nagsulod sa senate premises.
Nagpatigayon man sang clearing operation ang kapulisan samtang naghiwat sang press conference sanday DILG Secretary Jonvic Remulla kag Senate President Alan Peter Cayetano agud istoryahan ang mga natabo.
Sa pinakaulihi sang ila ginhimo nga timeline, pasado alas-2:00 sang kaagahon, gin-alegar nagpalagyo si Senator dela Rosa naggikan sa protective custody sang Senado, santo sa report sang mga imbestigador.
Sa karon, padayon gihapon ang maid-id nga imbestigasyon agud matumod ang kabug-usan nga detalye kag kun sin-o ang may salabton sa insidente.
