Wala nag-atubang si Batangas Representative Leandro Leviste sa National Bureau of Investigation (NBI) sang Huwebes may kaangtanan sa imbestigasyon sa ginaalegar character assassination plot batok kay Executive Secretary Ralph Recto.
Ginpa-subpoena sang NBI sanday Leviste kag anay mamalidha nga si Jing Paras matapos gin-akusaran nga nagplano sang honeytrap plot, sa diin gina-alegar nag-recruit sang mga kababainhan agud mag-file sang sala nga akusasyon batok sa opisyal sang Palasyo.
Suno kay NBI-NCR Regional Director Emeterio Dongallo Jr., natalana kuntani nga mag-atubang si Leviste alas-10:00 sang aga, apang tubtob sang hapon, wala pa ini sa gihapon nakaabot.
Ginpahayag niya nga bisan ang mga tiglawas ni Leviste wala naghatag sang kumpirmasyon nahanungod sa pagpangabay nga mag-reschedule.
Samtang, naghingyo naman ang abogado ni Paras sang rescheduling kag mga dokumento nga may kaangtanan sa kaso.
Gintugutan sang NBI ang request kag gintalana ang bag-o nga schedule sa masunod nga semana.
Ginalauman nga mag-atubang sanday Leviste kag Paras sa NBI sa Martes, Agosto 11.
Gin-athag man sang ahensya nga wala pa ginakabig ang duha bilang respondents ukon persons of interest, kundi mga resource persons lamang sa karon.
