Gintungahaan nga mapasakaan sang kaso subong nga adlaw ang duha ka holdupper nga nagbiktima sa doctor nga babayi sa GV Street, Brgy 19, Bacolod City.
Nadakpan alas- 9:00 sang gab-i sang Sabado si alyas Rem, 37-anyos, malapit sa Brgy hall sa Barangay 40 nga amo ang driver sang motorsiklo kag ala- 1:20 sang kaagahon kahapon nadakpan si alyas “Shan”, 32-anyos sa Deca Homes, barangay Cabug nga amo ang nagpanaya sang peke nga armas-luthang.
Nahibaluan nga naglikaw ang duha sa checkpoint sang Police Station2 apang nakita nila nga may checkpoint ang Police Station sa 1 sa pihak nga area kag ila man ini ginlakawan tubtob nga nalabyan nila ang doktora nga naga-isahaon lang nga nagalakat sa dalan.
Sa interview sang Bombo Radyo Bacolod kay Police Major Rondyl Tapang, station commander sang Bacolod City Police Station 1, pasakaan sang kaso nga robbery with intimidation sang article 294 sang Philippine Revised Penal Code (RPC) ang duha ka mga suspek.
Suno diri, ang biktima amo ang complainant sa kaso kag ang robbery with intimidation mas mabug-at sangsa kaso nga robbery lamang.
Sa karun nahunong ang duha sa Bacolod Police Station 1 samtang nakabisita na ang ila mga pamilya. Samtang, wala natandog ang P100,000 nga reward nga gintanyag sang Bacolod City Police Office nga ihatag sa makatudlo kun diin ang duha ka suspek nga nangholdup sa babayi nga doktor sa barangay 19, Bacolod City.
Si Rem nadakpan sa barangay 40, alas- 9:00 sang gab-i sang Sabado samtang si Shan nadakpan alas- 1:20 kahapon sang kaagahon sa Deca Homes, barangay Cabug.
Sa interview sang Bombo Radyo kay BCPO Director Police Colonel Eugene Rebadomia, ang kapulisan ang nakadakop sa mga suspek nga sanday alyas Rem, 37-anyos kag alyas “Shan”, 32-anyos.
Suno diri, ang kapulisan ang nakadakop sa mga suspek kag wala sila naqualify nga makabaton sang reward bangod ginahimo lamang nila ang ila trabaho.
Suno kay Rebadomia, nagkoordinar ang pamilya ni Shan sa ila matapos nga makita nga yara sa iya ang motorsiklo nga gingamit sa pagpangholdup.
Ang motorsiklo ginapanag-iyahan ni Rem apang matapos ang insidente ginpadala sini kay Shan ang iya motor.
Pahayag sini, ginalikawan nga hatagan sang monetary reward ang kapulisan bangod posible indi na sila magtrabaho sang insakto kag magsalig na lamang sa padya. Sa pihak nga bahin, ginlakip sa session sang Barangay council sang barangay 19, Bacolod City ang paghatag sang seguridad sa mga renters sa barangay kasunod sa natabo nga pagpangholdup sa doctor nga babayi sang Mayo 28 sang gab-i.
Sa interview sang Bombo Radyo kay Punong Barangay Kim Piramo, may yara sang mga barangay tanod nga nagaroving sa area apang sang natabo ang insidente wala pa naka-umpisa ang ikaduha nga roving sang mga tanod.
Suno diri, sadto madulom ang area kag may bangkay nga ginabilin didto apang sa karun masanag na ang lugar kag may ginbutang na nga poste nga may suga apang natiming lang nga wala sang iban nga tawo sang natabo ang insidente.
Suno kay Piramo, wala nakapalapit ang biktima sa barangay kag nakig-angot na sila sa nagapanag-iya sang apartment.
