Gintiro sang duha ka gina-alegar holdupper ang duha ka intelligence officer sa atubang sang Bureau of Jail Management and Penology office sa Magsaysay Avenue, Brgy Singcang-Airport, Bacolod City alas-9:00 kagab-i.
Ang mga pulis ang natumod nga intelligence officers sang City Intelligence Unit sang Bacolod City Police Office nga may ranggo nga Police Corporal kag Patrolman, nga bag-o lang natapos sa ila surveillance activity.
Samtang ang mga suspect ang ginkilala nga sanday Bernard Traje, 29 anyos, kasado, residente sang Prk Saging, Brgy Igmayaan, Don Salvador Benedicto; kag Romeo Araiz, 28 anyos, single, residente sang Prk Jalandon, Brgy 2, Bacolod City.
Sa interview sang Bombo Radyo Bacolod kay Police Major Lyndon Manilla, officer in charge sang Bacolod Police Station 8, samtang pabalik sa BCPO, natalupangdan sang duha ka pulis nga ginasundan sila sang motorsiklo.
Sa pagpanaog nila sa ginasakyan nga Toyota Vios, nagdulog man ang motorsiklo kag nanaog ang angkas nga gilayon naghunos sang armas kag ginluthang ang Police Corporal.
Ginapakamaayo naman nga wala sang may naigo, kag gilayon man nga nakabalos sang lupok ang Patrolman.
Wala man naigo ang mga suspect, kag sila ang gilayon nga nagsakay sa motorsiklo kag nalagyo.
Suno kay Manilla, gilayon nagpatigayon sang hot pursuit kag drag net operation ang kapulisan, nga nagresulta sa pagka-aresto sang duha sa atubang sang Maranatha Christian Academy sa Alijis Road, Prk Hollowblocks, Brgy Singcang-Airport.
May-ara man sang lastro ang duha, matapos matumba bangod sa lagsanay.
Narecover kay Araiz ang isa ka STI International cal. 45 pistol nga may loaded pa nga bala sa chamber, kag magazine nga may unod nga lima ka bala.
Samtang nakuhaan naman si Traje sang apat ka sachet sang suspected shabu nga ginabanta nagabug-at sang 20 gramos nga may standard drug price nga P136,000.
Ang duha ang pasakaan sang kaso sa paglapas sa Republic Act 10591 ukon Comprehensive Firearms and Ammunition Regulations Act, RA 9165 ukon Comprehensive Dangerous Drugs Act of 2002, kag attempted murder.
Suno kay Manilla, may mga impormasyon nga ang duha ka suspect amo man ang imbulbado man sa mga robbery-holdup incidents sa ciudad sang damlag lang.
Sa karun, ginatumod pa ang motibo sang pagpangluthang.
