Natalana nga pasakaan sang kaso subong nga adlaw ang magbayaw nga nagtiro sa duha ka intelligence officer sang City Intelligence Unit sang Bacolod City Police Office sa atubang sang Bureau of Jail Management and Penology office sa Magsaysay Avenue, Brgy Singcang-Airport, Bacolod City sang Miyerkules, alas- 9:00 sang gab-i.
Ang mag suspek ginkilala nga sanday Bernard Traje, 29 anyos, kasado, residente sang Prk Saging, Brgy Igmayaan, Don Salvador Benedicto; kag Romeo Araiz, 28 anyos, single, residente sang Prk Jalandon, Brgy 2, Bacolod City.
Ang duha nadakpan matapos manotisyaran sang duha ka pulis nga ginasundan sila sang motorsiklo kag sang nanaog sa salakyan ang Police Corporal kag Patrolman, nagdulog man ang motorsiklo kag nanaog ang angkas nga gilayon nagtiro sa Police Corporal.
Wala naigo ang pulis kag gilayon nga nagbalos sang lupok ang Patrolman.
Wala man naigo ang mga suspect nga gilayon nalagyo.
Apang nadakpan ang duha sa brgy Singcang-Airport paagi sa hot pursuit kag drag net operation.
Nakumpiskar ang cal. 45 pistol nga loaded sang bala, magazine nga may lima ka bala, apat ka sachet sang suspected shabu nga ginabanta nagabug-at sang 20 gramos nga may standard drug price nga P136,000 gikan sa duha.
Sa interview sang Bombo Radyo Bacolod kay Police Major Lyndon Manilla, officer in charge sang Bacolod Police Station 8, ang duha pasakaan sang kaso sa paglapas sa Republic Act 10591 ukon Comprehensive Firearms and Ammunition Regulations Act, RA 9165 ukon Comprehensive Dangerous Drugs Act of 2002, kag attempted murder.
Suno diri, ang duha ang ginatudlo nga mga suspek man sa holdup incident sa ciudad bangod may nagpalapit sa ila estasyon para kilalahon ang duha nga amo ang nangholdup sa ila.
