Nadevelop na bilang Bagyo ESTER ang ginabantayan nga Low Pressure Area sa pagsulod sini sa Philippine Area of Responsibility alas-3:00 kaina sang kaagahon.
Ang Tropical Depression ESTER ang ulihi nga nasiplatan sa 225 km sa nakatungdan sang Itbayat, Batanes.
Dala sini ang kabaskugon sang hangin nga nagadangat sa 45 km/h kag pagmadlos nga tubtob 55 km/h.
Ini ang nagahulag sa northeastward nga dereksyon sa kadasigon nga 20 km/h.
Ang Bagyo ang ginalauman nga maggwa sa PAR sa Sabado sang aga kag magapadulong sa Taiwan.
Samtang luwas sa Tropical Depression ESTER nga magapaulan sa Batanes, lauman man ang maulanon nga panahon sa dako nga bahin sang Western Luzon partikular na sa Ilocos Region, pila ka bahin sang Cordillera, Bataan, Zambales, pila ka bahin sang Cavite, pila ka bahin sang Occidental Mindoro, kag Metro Manila, nga tuga sang Southwest Monsoon ukon Hangin Habagat.
Ginapanugyan ang pag-aligmat bangod sa posibilidad sang mga pagbaha kag landslide.
Samtang makanay naman ang panahon sa Southern Luzon, Visayas kag Mindanao kun sa diin halos wala sang gal-om nga makit-an sa latest satellite imagery.
Apang yara gihapon ang posibilidad sang makadali nga pag-ulan dala sang Localized Thunderstorms partikular na sa hapon tubtob sa gab-i, kasubong man sa kaagahon.
