Mas nagdasig pa ang hulag sang Tropical Depression NENENG, samtang ini ang ginalauman na nga maggwa sa Philippine Area of Responsibility (PAR) karun sa hapon.
Ang bagyo ang ulihi nga nasiplatan sa 390 km sa naaminhan sang Itbayat, Batanes.
Ini ang may kabaskugon sang hangin nga nagadangat sa 45 km/h kag pagmadlos nga tubtob sa 55 km/h.
Padayon ini nagahulag sa West Northwestward nga direksyon sa kadasigun nga 30 km/h.
Samtang, duha naman ka tropical cyclone ang padayon nga gina-monitor sa gwa sang PAR.
Ang Tropical Storm SAUDEL ang yara sa 2,960 km sa nasidlangan sang Northeastern Mindanao, nga may kabaskugon sang hangin nga nagadangat sa 75 km/h kag pagmadlos nga tubtob 90 km/h.
Nagahulag ini sa kadasigon nga 25 km/h padulong sa Northwestward nga direksyon.
Samtang, ang tropical depression ang yara naman sa 1,100 km sa nakatundan sang extreme Northern Luzon.
Dala sini ang hangin nga nagadangat sa 45 km/h kag pagmadlos nga tubtob sa 55 km/h, padulong sa southwestward nga direksyon.
Padayon naman nga maeksperyensyahan ang epekto sang Southwest Monsoon ukon Habagat sa Luzon.
Lauman ang tumalagsahon nga pag-ulan sa Ilocos Region, Batanes, Zambales, kag Bataan, samtang maeksperyensyahan ang lapta-lapta nga pag-ulan sa Metro Manila, Cordillera Administrative Region, nabilin nga bahin sang Cagayan Valley kag Central Luzon, kasubong man sa Cavite, Batangas, Laguna, Rizal, Occidental Mindoro, Oriental Mindoro, kag Palawan.
Lauman man ang pugtak-pugtak nga pag-ulan sa nabilin nga bahin sang pungsod tuga sang localized thunderstorms.
