Patay ang 50-anyos nga barbero matapos ginluthang sang wala pa makilal-an nga suspetsado sa Purok Arao 2, Barangay Vista Alegre, Bacolod City, pasado alas-7:00 kagab-i, Hunyo 7.
Ang biktima ang ginkilala nga si Carlito Alcala Jr, kasado, kag residente sang nasambit nga lugar.
Sa interview sang Bombo Radyo Bacolod kay Police Captain Jay Reyes, officer-in-charge sang Bacolod Police Station 7, sa ila inisyal nga imbestigasyon, ang biktima ang may ginaguntingan nga isa ka estudyante sa iya nga balay sang may nagsulod nga isa ka armado nga lalaki kag hinali lang gintiro si Alcala.
Ang suspek ang gilayon nalagyo angkas sa motorsiklo nga ginamaneho sang isa pa gid ka indibidwal.
Suno kay Reyes, ang suspetsado ang nagasuksok sang facemask, kalo, kag itom nga jacket, base sa impormasyon sang isa ka eyewitness.
Gindala pa sa ospital ang biktima apang wala na ini natabangan pa.
Narekober naman sa crime scene ang tatlo ka empty shells.
Santo sa record sang otoridad, nahibaluan nga ang biktima ang may nakaligad nga kaso may kaangtanan sa illegal gambling.
