Faulty electrical wiring ang ginalantaw nga rasun sang driver sa hinali nga pagkasunog sang iya nga ginadala nga taxi unit samtang yara idalom nga bahin sang Bata Flyover sa Brgy Bata, Bacolod City.
Sa interview sang Bombo Radyo Bacolod kay Eduardo Garganera, 71 anyos, residente sang Brgvy Cabug, Bacolod City, gina-arkelahan lamang sini ang ginadrive nga Toyota Vios nga Taxi Unit.
Siya ang gikan sa Ceres South Terminal kag magadul-ong kuntani sang apat ka pasahero sa Ceres North Terminal.
Tubtob nga nakapanimaho ang mga pasahero sang sunog, gani iya man nga ginpanilagan kag nakita nga nagagwa na ang aso sa iya windshield.
Pagtsekyar, nakita ni Gargarena nga nagakalayo na ang iya makina, gani madasig man sini nga ginpapanaog ang mga pasahero.
Apisar sa pagka-abriya, nagbayad gihapon sang kumpleto ang iya mga pasahero.
Ginalantaw sini nga mahimo grounded ang iya wirings, kag gindakop sang kalayo.
Siya ang kumpleto naman sang contact number sang mga police stations sa Bacolod City gani gilayon ini nakatawag sang rescue, nga amo ang nagrelay sang impormasyon sa mga bombero.
Madasig man nga nakaabot ang mga firetrucks, apang nasunog na ang taxi, kag wala man sini nadala sa paggwa ang iya driver’s license kag senior citizen ID.
Ginpahibalo naman sini ang tag-iya sang taxi unit, kag ginahulat na lamang sini kun ano ang mangin desisyon sang tag-iya.
