Nagpaandam si Senator Panfilo “Ping” Lacson nga mahimo malab-ot sa constitutional crisis ang impeachment trial ni Vice President Sara Duterte kun kulang ang mga senator-judges bangud sa posible nga preventive suspension ukon pagka-priso sang pila ka senador angot sa imbestigasyon sa ginaalegar iregularidad sa mga flood control projects.
Bangud sini, ginpropose ni Lacson nga tun-an ang posibilidad nga pahanugutan nga matuman sang mga suspendido ukon naka-detain nga mga senador ang ila katungdanan bilang senator-judges sa impeachment court, apisar temporaryo nga indi sila makatrabaho bilang mga lehislador.
Suno kay Lacson, apisar isa lamang ang komposisyon sang Senado kag sang impeachment court, mahimo nga may legal nga interpretasyon nga ang duha ka institusyon ang magkatuhay nga mga entidad.
Ginpaathag sini nga kun siyam ka senador ang masuspender ukon mapriso, 15 na lamang ang mabilin nga myembro sang impeachment court.
Sa idalom sang Konstitusyon, nagakinahanglan sang 2/3 ukon 16 nga boto naggikan sa tanan nga senador.
Isa man ka ginalantaw nga opsyon amo ang temporaryo nga pagpaiway sang impeachment trial tubtob matapos ang 90-days preventive suspension sang mga maapektohan nga senador.
