Dismayado ang labor advocate nga wala gid ginhatagan sang pagtamod ang pending nga hagna sa wage increase sa ginpatigayon nga special session ni President Ferdinand Marcos Jr. sa Kongreso kahapon.
Sa interview sang Bombo Radyo kay Wennie Sancho, Secretary General sang General Alliance of Workers Association, ginpahayag sini nga may national minimum wage na nga napirmahan sa House of Representatives apang sa ginbalik sa senado, wala sa gihapon sang tupa ang bangud ini ang natabunan sa mga nagkalatabo nga kinagamo sang nagligad nga bulan.
Suno diri, dapat ini ang gintutokan kag hatagan sang prayoridad bangud apisar nga nauntat na ang gyera sa Middle East, padayon sa gihapon ang pagsaka sang presyo sang mga balaklon.
Suno kay Sancho, bangud nakay-o na ang liderato sa Senado, kinahanglan may ‘reform to work order’ sa mga senador kag ang indi magtuman ang hatagan sang penalty.
Dugang pa sini, kinahanglan nga ipatuman man ang ‘no work no pay’ sa mga senador bangud suno diri, unfair sa mga mamumugon nga pagusto lang sila kun maubra ukon indi kag mabaton lang sang sweldo.
Paathag sini, dapat ang mga senador amo ang ehemplo sa prinsipyo nga ang public office ang may public trust.
