Nagpasar sang resolusyon ang Sangguniang Panlungsod sang Bacolod nga nagapangabay sa pila ka National Government Agencies nga buligan nga masolbar ang problema sa blue crab sector kasunod sang import restriction sang Estados Unidos.
Ang ordinansa ang gin-author ni Councilor Atty Caesar Distrito nga nagapungko sa karun nga Acting Bacolod City Vice Mayor, kag ginco-author ni Councilor Atty Celia Flor.
Sa interview sang Bombo Radyo Bacolod kay Distrito, lakip sa dako nga naapektuhan sa pagban sa blue swimming crab ang Negros Occidental kag Bacolod City.
Suno kay Distrito, madamo sang coastal area sa Bacolod City kaangay sang ila Barangay sa Brgy Singcang-Airport, Pahanocoy, Tangub, Banago, kag iban pa kun sa diin nagasalig ang mga pumuluyo sa pagharvest sang blue swimming crab ukon kasag.
Dugang pa sini nga apektado man ang mga crab meat processing plant, cold storage, kag export operations.
Suno diri, bangod ang America ang pinakadako nga export market, ginalantaw na nga tuman ang mangin pagnubo sa presyo sang kasag.
Apisar nga maayo para sa mga lokal nga bumalakal ang pagnubo sa presyo, ini ang makaapekto naman sa mga nagaharvest sang kasag, dugang pa ang posibilidad sang pagsarado sang mga crab meat processing facilities, nga magatuga sang pagkadula sang madamo nga trabaho.
Suno kay Distrito, indi man sala sang mga nagapangabuhi paagi sa blue crab nga wala naproseso ang kinahanglan nga mga permits kag requirements.
Gani panawagan nila nga magbuligay ang Department of Agriculture, Bureau of Fisheries and Aquatic Resources (BFAR), Department of Environment and Natural Resources (DENR), Department of Trade and Industry (DTI), kag Department of Foreign Affairs (DFA) agud masolusyonan ang problema ang problema sang industriya.
Samtang nagapangitaan sang solusyon, panawagan man nila nga mahatagan sang alternatibo nga palangabuhian ang mga apektado nga pumuluyo.
