Apat ka indibidwal ang ginbawian sang kabuhi samtang nagdangat naman sa 22 ang pilason sa insidente sang pagpangluthang sa sulod sang San Jose National High School sa Barangay San Jose, Tacloban City, alas-9 sang aga kahapon, Hunyo 22.
Gilayon nga nag-responde ang mga kapulisan sang Tacloban City Police Office (TCPO) agud masiguro ang kaluwasan sang mga estudyante, manunudlo, kag iban pa nga school personnel.
Isa ka suspek ang naaresto sa lugar sang insidente samtang natigayon man nga nadakop ang isa pa ka suspek nga nalagyo sa ginpatigayon nga manhunt operation sang mga otoridad.
Gindala sa ospital ang mga nasamaran para sa nagakaigo nga medical intervention.
Padayon naman ang imbestigasyon sang kapulisan agud matumod ang motibo sang krimen.
Ginkondenar sang Police Regional Office-8 ang pagpangluthang kag nagdugang sang mga otoridad sa lugar agud mapabilin ang seguridad sa komunidad.
Bangud sa insidente, ginsuspender ang klase sa San Jose Central School, Manlurip Elementary School, kag San Jose National High School.
