“Fuel Tabs” ukon tabletas nga gina-alegar makapanubo sang konsumo sa gatong, ginasaligan sang pila ka motorista karun nga may fuel crisis

Bangud sang kakulang sang suplay sang gatong nga gintuga sang serye sang mga pag-atake sang drone sang Ukraine sa mga oil refinery sa Russia, madamo nga mga motorista ang nagasalig subong sa isa ka pinasahi nga solusyon, mga tableta nga ginapatihan nagatipid sang gatong ukon ang ila ginatawag nga “fuel tabs.”

Santo sa report, nagsaka ang porsyento sang kita sang nasambit nga tabletas sang nakaligad nga bulan.

Ang ini nga mga tabletas ang masami mabakal sa mga gasolinahan sa balor nga 50 tubtob 80 rubles ukon kapin P42 tubtob P67.

Ang fuel tabs ang ginapatihan nga may ikasarang nga panubuon ang konsumo sang gasolina kag mapabaskog ang performance sang makina.

Suno sa mga nagabaligya sini, isa lamang ka tablet ang kinahanglanon para sa tubtob 200 ka litro sang gasolina kag ang kalidad sang barato nga gatong ang mahimo pa gani mas mapataas kag mangin kaangay sa mga premium.

Apang, nagpaandam man ang mga eksperto nga wala sang maathag nga ebidensya nga nagasuporta sa ini nga mga pahayag.

Mahimo man magtuga sang problema sa mga fuel injectors kag makina ang chemical content sang nasambit nga tabletas.

Para sa mga kritiko, ang “fuel tabs” ang isa lamang ka “engine placebo” nga naga-capitalize sa kahadlok kag desperasyon sang mga motorista sa tunga sang nagasaka nga presyo kag kakulang sang gatong.