Patay ang 63 anyos nga babayi samtang pilason naman ang 73 anyos sini nga bana nga bag-o lamang nadischarge sa ospital matapos mabungguan sang motorsiklo samtang nagatabok sa pedestrian lane sa atubang sang Corazon Locsin Montelibano Memorial Regional Hospital sa Lacson Street, Bacolod City alas-3:41 kaina sang kaagahon.
Ang napatay ang ginkilala nga si Rosita Patoc, 63 anyos, samtang pilason naman ang iya nga bana nga si Genaro Patoc, 73 anyos, mga residente sang Brgy Pasil, EB Magalona.
Ang nakabunggo nga Yamaha Aerox 155 ang ginamaneho naman ni Zyrll Villanueva, 24 anyos, residente sang 30-B Burgos Locsin, Brgy 9, Bacolod City; samtang angkas naman sini si John Nelbert Cordova, 32 anyos, residente sang Prk Masinadyahon, Brgy 12, Bacolod City.
Sa interview sang Bombo Radyo Bacolod kay Police Major Elmer Bonilla, head sang Bacolod Traffic Enforcement Unit sang Bacolod City Police Office, parehas nga yara sa impluwensya sang makahulubog nga ilimnon ang driver kag backrider sang motorsiklo.
Ang mga ini ang nagabyahe gikan sa sur padulong sa norte nga dereksyon sa kadasigon nga 70 km/h sang mabungguan nila ang duha ka tigulang nga nagatabok sa pedestrian lane.
Bangod sa makusog nga impact, nalampos sa semento ang ulo ni Rosita nga nagresulta sang gilayon sini nga kamatayon.
Si Genaro kag ang duha ka suspect ang lunsay nag-angkon man sang mga samad sa lawas.
Ang tatlo ang ginhingagaw naman sulod sa ospital, samtang gindala na sa punerarya ang bangkay ni Rosita.
Pahanumdom ni Bonilla sa mga motorista nga maghinay-hinay lamang sa paglabay sa atubang sang mga ospital.
Suno diri, kalabanan sa mga yara sa palibot ang may ginabantayan nga pasyente kag problemado gani indi na dapat dugangan pa ang ila nga problema.
Ang driver sang motorsiklo ang mahimo mangatubang sang kaso nga reckless imprudence resulting to physical injury and homicide kun magapasaka sang kaso si Genaro.
Samtang, magapangatubang sang kaso nga Reckless Imprudence Resulting in Homicide ang driver sang motorsiklo nga nakabunggo sa mag-asawa nga bag-o lang nakaggwa sa Corazon Locsin Montelibano Memorial Regional Hospital (CLMMRH), Lacson St. Barangay 9, Bacolod City alas-3:41 kaina sang kaagahon Hunyo 25.
Sa interview sang Bombo Radyo kay Traffic Enforcement Unit Head Police Major Elmer Bonilla, ginpahayag sini nga ang driver sang motorskilo ang wala nakasuksok sang helmet kag naka-inom sang makahulubog nga ilimnon.
Panugyan sini sa mga nagabiyahe sa dalanon ilabi na sa malapit nga ospital nga maghalong kag indi na magdugang sa problema sa iban nga tawo.
Samtang suno naman sang nakawitness sa insidente nga si John Mark, madasig ang pagpadalagan sang motorsiklo kag nakibot na lamang siya nga may naglagabong kag nakita sini ang 63-anyos nga senior citizen nga nagakaya sa tunga sang dalan nga wala na sang kabuhi.
Suno kay Mark, ang mag-asawa ang nagakapyutay sang sila ang nagatabok sa pedestrian lane sang hinali lang nag naglabay ang motorsiklo kag nagbunggoan ang duha.
Dugang pa sini, may nakita man nga buka nga botilya sang red horse sa tupad sang driver apang wala pa natumod kun kay sin-o ini.
