Nagdangat na sa kapin 50 ka mga e-bike units ang ginpangsikop kag gin-impound sang Bacolod Traffic and Transport Management Department sa subong nga bulan sang Hunyo.
Sa interview sang Bombo Radyo Bacolod kay BTTMD officer in charge Atty Reuben Sabig, ang mga e-bike ang ginakonsiderar nga colorum.
Suno diri, sila ang nagalibot kag nagapanakop sang mga colorum tricycle, kag nalakip na diri ang e-bike.
Kun sa diin subong nga Hunyo lamang, sila ang naka-impound na sang kapin 50 partikular na sa Brgy Handumanan.
Paathag ni Sabig nga ang sarang lamang mahatagan sang Barangay sang license to operate ang mga trisikad.
Apang ang mga ini ang kinahanglan pa nga magkuha sang business permit sa ciudad antes mahatagan sang license to operate.
Samtang ang mga miyembro sang Tricycle Operators and Drivers’ Association (TODA) ang sa ciudad na mismo nagakuha sang business permit kag prangkisa.
May-ara man sang mga miyembro sang TODA nga mga ebike nga ginapatakdan sang sidecar, kag ini ang ginapahanugutan.
Apang paathag ni Sabig nga indi pwede magserbe nga public utility vehicle, ukon depasahe ang mga ebike nga wala nakakuha sang business permit kag prangkisa.
Sa karun ginaproseso naman sang Sangguniang Panlungsod ang pagregulate sa mga e-bike, kag kun sila ang makapasar na sang ordinansa para sa pagsulundan sa pagbyahe.
Nahibaluan nga nagdangat sa 300 ang mga narecord nga ebike sa Brgy Handumanan, samtang 270 naman ang sa Brgy Felisa, kag ang ila nga routa ang konektado lamang.
Suno kay Sabig ang 570 ka mga ebike nga magabyahe sa isa lamang ka lugar ang makatuga sang paggutok sang trapiko.
Paathag sini nga ang ila pagpanakop ang para man sa safety sang mga pasahero.
Sarang naman nga maclaim sang tag-iya ang ebike paagi sa pagbayad sa colorum violation nga P2,000 kag P1,000 para sa towing.
